شرح كامل لبرنامج ضغط الملفات وفك الضغط الشهير وينرار Win Rar

بسم الله
السلام عليكم ورحمة الله وبركاته
كيف الاحوال
إن شاء الله تمام
النهارده يا ولاد هنشرح برنامج الكل عارفه وبيستخدمه سواء بمزاجه أو غصب عنه ( لما واحد زيى يرفع ملف مضغوط)
البرنامج ده أشهر من نار على علم

أيوه تمام مضبوط هو برنامج وينرار Win Rar
البرنامج موجود هنا فى المدونة النسختين النسخة الـ 32 بت والنسخة الـ 64 بت
تقدر تحملهم
البرنامج وظيفته ضغط الملفات يعنى تقليص مساحتها وكمان بيقوم ببعض وظايف تانية أثناء الضغط هنعرفها من خلال الشرح.

طيب وإيه فايدة ضغط الملفات؟

أقول لسيادتك أولا ممكن عشان توفر مساحة على القرص الصلب بتاعك ، أو عشان لما ترفع الملف على النت مياخدش وقت ومساحة ، أو عشان تقسمه أجزاء أو تقفله بكلمة سر وهكذا.
أول حاجة تثبيت البرنامج على جهازك ودى خطوة سهلة جدا
بعد ما سياستك تحمل الملف وتفك ضغطه طبعا تشغله
تطلع لحضرتك النافذة دى

علطول سياستك تعمل زى ما فى الصورة وتخش ع اللى بعدها

تسيبه لما يخلص ويديك النافذة دى

متلعبش فى أى حاجة دوس بس OK وانت ساكت وخش ع النافذة اللى بعدها

دوس Done  هيفتح لك صفحة زى دى

اقفلها ملهاش لازمة معانا خالص
وبكده انتهت مرحلة تثبيت البرنامج على الجهاز ومبروك عليك يا سيدى جالك وينرار يتربى فى عزك وتدوبه فى عرق العافية
نخش على الشغل المفيد وركز معايا عشان فيه شوية بهاريز جامدين فى الكلام اللى جاى
أول حاجة هنعرف إزاى
                     نضغط الملفات
                     نقفل الأرشيف ( ناتج الضغط ) بكلمة سر
                     نقسم الملفات الكبيرة إلى أجزاء نحدد حجمها إحنا أو نختار من مجموعة أحجام موفرها البرنامج
أول حاجة يا جماعة ناتج الضغط بنسميه أرشيف يعنى الملف المضغوط اسمه أرشيف عشان تبقى واضحة بعد كده ومحدش يسألنى تقصد إيه بأرشيف
روح على الملف أو المجلد اللى انت عاوز تضغطه واعمل كليك يمين تظهرلك قائمة بالشكل ده

اختار زى ما فى الصورة  تظهرلك نافذة الضغط السريعة يعنى مش نافذة البرنامج لا نافذة ضغط مختصرة فيها وظائف الضغط بس لأن حضرتك عاوز تضغط ملفات يبقى الجواب على قدر السؤال

الارقام تفسيرها كالآتى
1- ده اسم الملف وأما تحب تغيره لازم تسيب الجزء الأخير اللى نقطة وبعدين rar
2- خانة بنكتب فيها حجم أجزاء الملف لو هنقسمه على أجزاء وممكن نفتح القائمة ونختار منها من مجموعة اختيارات ثابتة
3- لو علمت على الخانة دى البرنامج هيمسح الملف بعد انتهاء عملية الضغط خلى بالك هيمسح الملف الاساسى اللى انت عملت عليه كليك يمين عشان تضغطه مش هيمسح الارشيف
4- عمل ملف ذاتى الفك ودى هنتكلم عنها باستفاضة فى الحلقة الجاية من برنامج عالم البحار إن شاء الله .
5- إنشاء أرشيف جامد ودى بردو الحلقة الجاية إن شاء الله
فيه عندك جزئية إسمها Archive Format 
ودى فيها اختيارين الاول العادى بتاع البرنامج والتانى الصيغة بتاعة الويندوز ولو هترفع الملف ع النت يستحسن تستخدم الصيغة التانية عشان لو اللى هيحمل الملف معندوش البرنامج يقدر يفك ضغط الملف بالويندوز بدون برامج
خلاص كل حاجة واضحة؟ نخش على الجزئية اللى بعدها

نفصص الصورة
طبعا الشكل ده هيظهر لما تدوس على التبويب Advanced من فوق
بص يا سيسى
عندك NTFS options كبر دماغك منها ملتزمناش
وعندك System
أول اختيار معناه ضغط فى الخلفية يعنى بعد ما سياستك تدوس OK البرنامج هيضغط الملفات بتاعتك بدون ما يظهرلك أى نوافذ تدل على تقدم عملية الضغط
اللى بعده يعنى بنقول للبرنامج اطفى الكمبيوتر بعد ما تخلص ضغط يا عم الحاج
التالت والاخير معناه إذا كان فيه أى عملية ضغط تانية شغالة انتظر لحد ما تخلص
والسهم بيشاور على زر إنشاء كلمة سر تدوس عليه تطلعلك النويفذة دى

بس سياستك تحط الباسورد اللى انت عاوزه فى الخانة الأولى وتكرره فى الخانة التانية

وعندك تحت اختيارين الاول بيظهر الباسورد بدال النقط عشان تشوف انت بتكتب ايه لأنك لو غلطت فيها انسى انك تفك الملف ده تانى.

الاختيار التانى تشفير اسماء الملفات.

يعنى إيه؟

أقول لسياستك بص يا سيسى لما بتعمل باسورد للأرشيف من غير ما تختار تشفير أسماء الملفات ده معناه أن أى حد يقدر يفتح الأرشيف فى برنامج وينرار ويعرف محتواه ( أسماء المجلدات والملفات بس ) لكن ميقدرش يفكه إلا بكلمة المرور

لكن لما تعلم على تشفير الملفات الملف مش هيفتح أساسا فى برنامج الوينرار إلا بالباسورد يعنى محدش يقدر يعرف محتواه إيه إلا بالباسورد.

وضحت دى ؟ تمام يا باشا والله انت روعة.

العفو يا سيسى ده واجبنا وإحنا فى الخدمة .

فى حالة اختيار اظهار كلمة السر هيكون شكل النافذة كده

خلاص ندوس OK ونرجع للنافذة الأولى بتاعتنا
طيب خلصنا خلاص موضوع الباسورد
نخش على نقطة تقسيم الملف إلى أجزاء
ليه ممكن أحتاج إنى أقسمه إلى اجزاء؟ ( ده سياستك بتسأل طبعا )
لأسباب كتير منها إنك ممكن تكون محتاج ترفعه على النت وموقع رفع الملفات مبيسمحش بأحجام كبيرة تضطر تقسمه لأجزاء صغيرة عشان تقدر ترفعه أو إن الاتصال عندك بطئ وبيفصل كتير فلو رفعت الملف كله دفعة واحدة كل شوية يفصل وتجيب من الاول لكن لو قسمته أجزاء هيبقى سهل ولو فصل فى جزء متجيبش الملف كله من الاول تعيد بس رفع الجزء اللى فصل فيه
وممكن تكون عاوز تحط الملف على مجموعة اسطوانات وحجمه كبير ميجيش على اسطوانة واحدة تقوم تقسمه أجزاء وهكذا.
طيب ازاى أقسمه أجزاء
بص ع الصورة دى

مكان ما احنا مشاورين هتكتب حجم كل جزء حسب ما يناسبك وبعده تكتب mb يعنى ميجا بايت.
وتدوس OK تجيلك نافذة بتوريك تقدم عملية الضغط زى كده

بعد ما تخلص هتختفى ويكون الناتج عندك كده

ده يا سيدى ناتج عملية الضغط ملفك متقسم لأجزاء حسب ما انت تحدد حجمها
طيب أحيانا لما بتفتح ملف أرشيف بتلاقى البرنامج عرض فى النص اليمين بتاعه كلام ومعلومات زى مثلا الموقع اللى تم تحميل الملف منه وخلافه طيب إزاى نضيف المعلومات دى على الارشيف؟
أقولك
شوف كده الصورة دى

طبعا انت عارف النافذة دى ولا نسيت؟ دى النافذة الاولانية بتاعتنا هتجيب تبويب Comment وتكتب فى المربع الكبير اللى تحت اللى انت عاوزه أو ممكن لو عندك نص جاهز فى مستند نصى تجيبه من الخانة اللى فوق يعنى لو انت راجل شغلتك ضغط الملفات بدال ما كل ملف تقعد تكتب التعليق بنفسك ممكن تعملهم مرة واحدة وتخزنهم فى ملف نصى وتحطهم فى كل ملف مرة واحدة
نتيجة العملية  دى هتكون بالشكل ده

بص النص اللى احنا كتبناه ظهر فى برنامج الوينرار والنجمة اللى قدام اسم الملف معناها انه مقفول بكلمة سر.

طيب ازاى نفك الملفات اللى ضغطناها؟

أقولك يا سيدى بص كده على الصورة دى

هنعمل كليك يمين على أى ملف من أجزاء الملف إذا كان متقسم لأجزاء أو إذا كان مش متقسم نروح نعمل كليك يمين عليه ونختار اللى فى الصورة
لو الأرشيف مش محمى بكلمة سر هيتفك علطول مكانه أما لو كان محمى بكلمة سر هتظهرلك النافذة دى

اكتب كلمة السر فى الخانة الفاضية ودوس OK هيتفك الملف
وبس خلاااااااااااص
كده خلصنا شرح البرنامج وفاضل بعض المهام المتقدمة هنشرحها الحلقة الجاية لأنى تعبت بصراحة ومش هينفع نشرح أكتر من كده لأن الموضوع كده هيبقى طويل جدا

وأى استفسار أنا فى الخدمة
إذا كان لديك أى استفسار خارج نطاق هذا الموضوع أو أتيت من محرك بحث تبحث عن شئ ولم تجده هنا يمكنك استخدام خاصية البحث فى المدونة وإن لم تجده على صفحات المدونة يمكنك طرحه هنا وسنعمل على توفيره لك فى أقل من 24 ساعة إن شاء الله

استفسارات وطلبات الزوار 

إذا أعجبتك المدونة وأردت متابعة المواضيع الجديدة التى تطرح فيها يمكنك الاشتراك فى خدمة جديد المدونة ( الاشتراك أسهل من الاشتراك فى المنتديات والمواقع ولا يأخذ سوى نصف دقيقة المطلوب ايميلك فقط والتأكيد برسالة التفعيل)

كيف أشترك فى خدمة جديد المدونة؟

الصفحة الرئيسية

مدونة كل يوم

تحياتى لكم جميعا

تحياتى القلبية لك وأتمنى يكون الشرح واضح وكافى
السلام عليكم ورحمة الله وبركاته

مواضيع ذات صلة :